'Zanzibar Matibabu Card' yashinda tuzo ya WSIS

NA MWANDISHI MAALUM, USWISI

WIZARA ya Afya Zanzibar imetunukiwa tuzo ya kimataifa ya ‘World Summit on the Information Society’ (WSIS) kutokana na mafanikio ya utekelezaji wa mfumo wa matibabu kwa njia ya kadi maalum ya kidijitali ijulikanayo kama ‘Zanzibar Matibabu Card’, ambao umewezesha utoaji wa huduma bora za afya kwa wananchi kupitia teknolojia.

Hafla ya kukabidhi tuzo hiyo ilifanyika Geneva, Uswisi na kuhudhuriwa na Waziri wa Teknolojia ya Habari na Mawasiliano wa serikali ya Jamhuri ya Muungano wa tanzania, Jerry Slaa, Balozi wa Tanzania Geneva, Abdallah Possi, pamoja na wajumbe kutoka Mamlaka ya Serikali Mtandao Zanzibar (e-GAZ) na Mamlaka ya Mawasiliano Tanzania (TCRA).

Akipokea tuzo hiyo kwa niaba ya Serikali ya Mapinduzi Zanzibar, Waziri wa Afya Zanzibar, Nassor Ahmed Mazrui,  alisema mpango huo ni uthibitisho wa dhamira ya taifa kutumia teknolojia kuboresha maisha ya wananchi.

Alieleza kuwa mfumo huo umeunganisha vituo vyote vya afya vya umma na taarifa za matibabu za wagonjwa kwa njia ya kidijitali, hatua inayochochea uwazi, ufanisi na usawa katika sekta ya afya.

“Mpango huU unawezesha upatikanaji na utoaji wa huduma za afya katika eneo lolote, ukiwa mfano wa kuigwa kwa nchi za kipato cha chini na cha kati zinazolenga kufikia mpango wa Huduma za Afya kwa wote (UHC) kupitia mifumo ya kidijitali”, alisisitiza Mazrui.

WAZIRI wa Afya Zanzibar, Nassor Ahmed Mazrui, akizungumza baada ya kupokea tuzo ya kimataifa ya ‘World Summit on the Information Society’ (WSIS) kwa niaba ya Serikali ya Mapinduzi Zanzibar iliyotolewa mjini Geneva, Uswisi, hivi karibuni. Kulia ni Waziri wa Teknolojia ya Habari na Mawasiliano wa Serikali ya Jamhuri ya Muungano wa Tanzania, Jerry Slaa. 

Akizungumzia hatua hiyo, Mkurugenzi wa Programu wa PharmAccess, Faiza Abbas, alisema mradi huo umedhihirisha uwezo wa uvumbuzi wa kidijitali katika kufanikisha huduma bora za afya na kuziba pengo la usawa.

Alibainisha kuwa mfumo huo unaunganisha moja kwa moja rekodi za matibabu kupitia mifumo mbalimbali kama SHAMS-EMR, NSK-EMR na ZanEMR kwa ngazi tofauti za huduma nchini na hivyo kusaidia usimamizi bora wa afya ya jamii.

Faiza alieleza kuwa mafanikio ya mradi huo yamewezeshwa na ushirikiano wa karibu baina ya PharmAccess, UNICEF, ZEDCo, NSK Tanzania na Hospitali ya Saifee.

Alisema kuwa ushirikiano huo umesaidia kuhakikisha mfumo huo wa kidijitali unalingana na sera za taifa na umeunganishwa na kitambulisho cha Mzanzibari mkaazi (ZanID) pamoja na vyeti vya kuzaliwa, hatua inayolenga uendelevu wa mpango huo kwa miaka mingi ijayo.

Kwa mujibu wa Faiza, Kadi ya Matibabu Zanzibar ni mfano bora unaoonyesha namna ambavyo matumizi ya teknolojia yanaweza kuimarisha utoaji wa huduma za afya kwa wote na kusaidia nchi za kipato cha chini na cha kati kufikia huduma jumuishi za afya kwa wote (UHC).

Tuzo hiyo ya WSIS imekuja wakati ambapo serikali nyingi duniani zinatafuta mifumo ya afya yenye usawa na inayostahimili changamoto mbalimbali.

Mpango wa ‘Zanzibar Matibabu Card’ tayari umesajili zaidi ya wananchi milioni 1.7, huku miundombinu ya kidijitali ikiruhusu hospitali na vituo vya afya vya jamii kushirikiana taarifa za wagonjwa kwa wakati halisi.

Comments

Post a Comment

Popular posts from this blog

Airtel Foundation yazindua mpango wa udhamini wa masomo kwa vijana

Image
NA MWANDISHI WETU KAMPUNI ya mawasiliano ya Aiirtel Tanzania imezindua mpango wa udhamini wa masomo katika fani za teknolojia kwa vijana wa Afrika wanaosoma katika taasisi ya teknolojia ya india (IIT – Madras) kampasi ya Zanzibar. Uzinduzi huo umefanyika Oktoba 7, 2024 katika kampasi ya chuo hicho Bweleo, wilaya ya Magharibi ‘B’ Unguja na kuhudhuriwa na viongozi mbali mbali akiwemo Mkurugenzi Mtendaji wa Airtel Tanzania, Dk. Dinesh Balsingh na Waziri wa Elimu na Mafunzo ya Amali Zanzibar, Lela Muhamed Mussa. Viongozi wengine ni Naibu Waziri wa Elimu, Sayansi na Teknolojia Jamhuri ya Muungano wa Tanzania, Omar Kipanga, Balozi wa India nchini Tanzania, Dk. Biswadip Dey, Katibu Mkuu, Wizara ya Ujenzi, Mawasiliano na Uchukuzi, Makame Machano Haji na Mkuruaenzi wa IITMZ Prof. Preeti Aghalayam. Akizungumza kwa niaba ya Mwenyekiti wa Airtel Africa, Dk. Segun Ogunsanya,   Dk. Dinesh amesema programu hiyo inahusisha wanafunzi wa Afrika walofaulu michipuo ya sayansi na kwamba kila mwak...
Read more

ZAMECO yakerwa na video ya udhalilishaji mtandaoni

Image
NA MWANDISHI WETU KAMATI ya Wataalamu wa Masuala ya Habari Zanzibar (ZAMECO) inayoundwa na taasisi za kihabari na wadau wa habari imelaani video inayosambaa kwenye mitandao ya kijamii inayoonesha wasichana wawili waliorekodiwa na kuulizwa maswali yasiyo na maadili, kuvunja heshima na kukiuka haki za binaadamu. Taarifa iliyotolewa na taasisi hizo na kutiwa saini kwa pamoja na mwenyekiti wa klabu ya waandishi wa Habari Zanzibar (ZPC), Abdallah Mfaume na Mkurugenzi wa Chama cha Waandishi wa Habari Wanawake Tanzania (TAMWA ZNZ), Dk. Mzuri Issa, ilieleza kuwa tukio hili limeibua hisia kali kwa wadau wa habari, watetezi wa haki za binaadamu najamii kwa ujumla. Ilielezwa kuwa tukio hilo pia limeibua maswali yasiyo na majibu miongoni mwa wanahabari kuhusu maadili, haki za binadamu, na misingi ya uhuru wa vyombo vya habari. “Hivyo basi ZAMECO inasisitiza kuwa vitendo vya udhalilishaji kwa watoto wa kike na jamii ni ukiukwaji wa haki za binaadamu, maadili ya uandishi wa habari na kuvuruga ...
Read more