Airtel Foundation yazindua mpango wa udhamini wa masomo kwa vijana

NA MWANDISHI WETU

KAMPUNI ya mawasiliano ya Aiirtel Tanzania imezindua mpango wa udhamini wa masomo katika fani za teknolojia kwa vijana wa Afrika wanaosoma katika taasisi ya teknolojia ya india (IIT – Madras) kampasi ya Zanzibar.

Uzinduzi huo umefanyika Oktoba 7, 2024 katika kampasi ya chuo hicho Bweleo, wilaya ya Magharibi ‘B’ Unguja na kuhudhuriwa na viongozi mbali mbali akiwemo Mkurugenzi Mtendaji wa Airtel Tanzania, Dk. Dinesh Balsingh na Waziri wa Elimu na Mafunzo ya Amali Zanzibar, Lela Muhamed Mussa.

Viongozi wengine ni Naibu Waziri wa Elimu, Sayansi na Teknolojia Jamhuri ya Muungano wa Tanzania, Omar Kipanga, Balozi wa India nchini Tanzania, Dk. Biswadip Dey, Katibu Mkuu, Wizara ya Ujenzi, Mawasiliano na Uchukuzi, Makame Machano Haji na Mkuruaenzi wa IITMZ Prof. Preeti Aghalayam.

Akizungumza kwa niaba ya Mwenyekiti wa Airtel Africa, Dk. Segun Ogunsanya,  Dk. Dinesh amesema programu hiyo inahusisha wanafunzi wa Afrika walofaulu michipuo ya sayansi na kwamba kila mwaka wanafunzi 10 kutoka nchi 14 za Afrika watanufaika na udhamini huo.

Aidha Dk. Dinesh ameeleza kuwa kampuni hiyo kama mdau wa mawasiliano wanachukua nafasi hiyo na kuingia makubaliano ya kusomesha vijana hao kwa zaidi ya shilingi bilioni 1.3 kila mwaka.

“Hii ni fursa kwa wanafunzi wanaotoka nchi za Afrika hasa Tanzania waliodahiliwa na kusoma katika chuo hiki ambao watapata ujuzi utakaosaidia nchi zao kwa kuleta mapinduzi makubwa katika sekta ya teknolojia na mawasiliano”, alieleza Dinesh na kuipongeza IIT Madras kwa kukubali ubia na kampuni yake kuendesha programu hiyo.

Kwa upande wake Waziri Lela amesistiza haja ya taasisi na kampuni za mawasiliano kuwekeza katika elimu ya vijana ili taifa lipate wasomi waliobobea katika fani mbali mbali ikiwemo teknolojia.

Amesema programu hiyo ya pamoja kati ya IITMZ, Airtel Foundation na Serikali ya Jamhuri ya Muungano wa Tanzania, inapaswa kupongezwa kwani itawawezesha vijana wa Afrika kupata elimu na ujuzi juu ya sayansi ya data na akili mnemba ambazo ni changamoto za dunia ya sasa.

“Serikali zetu zote mbili zinachukua jitihada kuhakikisha inawawezesha vijana kuwa wataalamu wa fani mbali mbali hivyo naomba makampuni mengine kuiga mfano wa Airtel kuwasadia vijana wapate ujuzi na nchi kuwa na wataalamu watakaoendeleza nchi yao”, ameeleza Waziri Lela.  

Naye, Balozi Dey,  amesema katika  ulimwengu wa kidijitali, ufikiaji wa elimu bora katika nyanja za sayansi ya data na akili mnemba (AI) si anasa bali ni hitaji la kusukuma ukuaji wa uchumi, uvumbuzi na maendeleo.

Aidha, amesema mpango wa ‘Airtel Africa Fellowship’ unalingana kwa karibu na maono ya India katika mustakabali wa kidijitali.

“Tunapokaribia mwaka 2047, maadhimisho ya miaka 100 ya uhuru wa India, tunajitahidi kuhakikisha kuwa ujumuishaji wa kidijitali, ufikiaji wa teknolojia na elimu ya kiwango cha juu duniani unafikia kila kona ya jamii yetu,” alisema.

Naye Naibu Waziri Kipanga, akizungumza kwa niaba ya Waziri Profesa Adolf Nkenda, aliipongeza Airtel tanzania kupitia Airtel Fondation kwa kuendelea kuiishika mkono serikali kwa kuwaelimisha vijana wa Tanzania na Afrika kwa ujumla.

“Jukumu la kuelimisha vijana ni la serikali lakini peke yake haiwezi hivyo tunapopata wadau wa elimu kama Airtel ina maana tunasogeza karibu na jamii fursa za kupata elimu na ujuzi unaolinufaisha taifa”, alisema.

Sambamba na hayo alieleza kuwa serikali itaendelea kutoa mikopo ya elimu ya juu, ufadhili kupitia mpango wa ‘Samia Scholarship’ na kuunga mkono juhudi za wadau wa elimu ili ndoto na dhamira ya kupata wataalamu wazalendo ifikiwe.

Naye Katibu Mkuu wizara ya ujenzi na mawasilano, Mkame, alisema wizara hiyo inahudumia sekta ya mawasiliano ikiwemo kampuni ya Airtel ambao wameonesha mfano wa kuigwa kwa kampuni nyengine hivyo jamii inapaswa kutumia fursa hiyo kwa kujiunga na kozi za umahiri katika teknolojia, akili mnemba na ulinzi wa mitandaoni hatua itakayozalisha wataalamu wanaohitajika na nchi zao.